• Tarentaal Restaurant Die Tarentaal Restaurant is oop van Woensdae tot Sondae

  • Adam Tas Woensdag, 9 & 10 November

Welkom by die Tarentaal teater en Restaurant

 
 

Soos altyd bly ons Tarentaal ook nog steeds die lekkerste (en seker ook die goedkoopste) plek vir funksies.

Vir jou gerief is ons beskikbaar vir funksies van Maandag tot Sondag.
Bespreek dus nou jou troue, jaareindfunksie, verjaarsdag, ooievaarstee ens.

Sien ons Restaurant & Funksies blad vir lekker Boerekos by ons Restaurant of bespreek nou vir ‘n funksie!

 

Ons Geskiedenis:

Agtergrond
Soos die Rustenburg omgewing vir baie jare bekend was vir sitrus verbouing en uitvoere met die sogenaamde “Outspan” handelsmerk, was die plaas waarop die Tarentaal Teater gebou is, ook ‘’n baie bekende sitrusplaas.

Die Naam
Die plaasnaam “Pomona” (afgelei van die Romeinse godin van vrugte) is in 1914 deur Mnr. Mackenzie aan die plaas gegee, nadat hy in die 1880’s, as ’n jong man op ‘n plaas naby Los Angeles, California, U.S.A, met dieselfde naam, die wêreld se eerste navel lemoenbome versorg het.

Die boerdery
Met die internasionale ervaring wat Mnr. Mackenzie in die V.S.A. en Australië opgedoen het, was Pomona ’n prominente sitrusplaas wat baie toekennings ingepalm het. Die vrugte is oorspronklik hier in die pakhuis, nou die Tarentaal Teater, verpak en na Londen uitgevoer. In die 1920’s was Mnr. Mackenzie ‘n stigterslid van die Rustenburg Sitrus Koöperasie in Lukasstraat en was dit nie meer nodig om die lemoene hier te verpak nie en is die pakhuis as stoor gebruik.

Die eienaars
Die plaas is in 1914 deur Mnr. Mackenzie van Mev. Botha gekoop. Met die afsterwe van Mnr. Mackenzie, word die plaas deur sy twee kleindogters Natalie en Rose-Mary geërf. Vir die eerste keer in 87 jaar word Pomona verkoop toe die bejaarde Mackenzie erfgename, op 30 Julie 2001, die plaas aan die huidige eienaars verkoop…

Die Tarentaal Teater word ‘gebore’ met die sukses van die eerste ‘Koos du Plessis’ vertoning in November 2009 en is alreeds tweemaal vergroot om te voldoen in die aanvraag en kan spog met vertonings deur van die beste kunstenaars.

 

Geboorte van 'n droom:

Die gewaarwording was altyd daar...van die heel eerste keer af, was dit daar. Toe ek in hierdie "blikstoor" ('n naam wat my skoonpa dit sou gee) instap het ek geweet; iets spesiaals moet hiervan gemaak word.
Ek wou graag musiek maak, Koos du Plessis se musiek. Hoekom vra ons nie ook ander kunstenaars om hulle musiek hier te kom aanbied nie?
En so het die droom begin groei. Met baie aanmoediging van my gade, ons kinders en die publiek het die droom waarheid geword in die somer van 2009.
Die eerste Koos Dup musiekaand - hier in ons eie teater! Dit was 'n ongelooflike aand - en die begin van baie wat sou volg.
Dit is nou bykans vyf jaar later en dit lyk my ons tarentaaltjie is besig om vinnig te groei en mooi sterk te word. Ons opregte dank aan ons ongelooflike lojale ondersteuners , dankie dat julle aanhou terugkom, met nuwe vriende wat ook wil deel in die Tarentaal 'magic.' Dankie vir die son van genade wat ons Vader oor ons teater laat skyn.
O ja! Die musikante is gewoonlik saans in kompetisie met ons plaaslike tarentaal bevolking. Omdat die tarentale op musiekaande tot laat wakker gehou word en hulle bekke moet hou, het ons ooreengekom dat die teater na hulle vernoem word...........
Chris

Algemene Reëlings:

Tafel plasings word gedoen volgens datum van betaling van voor na agter - jou tafel sal op die aand aangewys word
Bespreek 'n heerlike ete saam met jou kaartjie of bring 'n lekker piekniekmandjie; etes is nie verpligtend nie
Ons het 'n ten volle gelisensieerde kroeg.
Geen stootwaentjies; bring gerus 'n kombersie saam vir jou kleuter om op te sit
Julle samewerking in die verband sal regtig baie waardeer word

 

Dag-sê Tarentalers

Lyk my die winter het ook hier by ons teen die berg uitgekom! Gelukkig het ons lekker baie doringhout om die koolstowe en die sop vuurwarm te hou.
Soos julle seker weet gaan dit nie te waffers met ons stad se ekonomie nie en word die bedryf waarin ons is, gewoonlik eerste negatief geraak. Dit word ‘n al hoe groter uitdaging om die kwaliteit musiekkonserte waaraan julle hier by die Tarentaal gewoond geraak het, aan te bied.

Met bogenoemde in gedagte, wil ek ‘n beroep doen op julle, ons getroue Tarentaal ondersteuners - wat die ruggraat van ons besigheid is - om asb. in plaas daarvan om julle eie drank te bring, ons kroeg op Vrydagaande te ondersteun.

Ons is ten volle gelisensieer en sal poog om ‘n goeie verskeidenheid voorraad teen billike pryse aan te bied.

Ons deel julle liefde vir musiek en dit sal ons baie help om aan te hou om vir julle die beste vermaak na julle voorstoep te bring.

Weereens, baie dankie vir julle getroue ondersteuning. Ons sien altyd daarna uit om julle by die Tarentaal te verwelkom.

Tarentaal groete!
Chris, Anita en Michelé